Corona Vs. આત્મનિર્ભર

હવે આત્મનિર્ભર શબ્દ પકડાઈ ગયો. મારા જેવા કરોડો સલાહકારોનો રાફડો ફાટયો. અડધો પહોર દિ ચડયા પછી ઉઠીને ઘટાટોપ દાતણીયા બાવળના છાંયે બેસી વિદેશનું ટુથ પેસ્ટ મોઢામાં હોય. હાથમાં ચાઈનાનો મોબાઈલ રાખી યુરોપાન પર બેસી હંગતા હંગતા માર્ક ઝુકરબર્ગની fb પર સ્વદેશીની પોસ્ટ મુકવાની. ઈટાલીયન ફર્સ અને વિદેશી ફર્નીચર ઓનલાઈન મંગાવી વિદેશી એપ વોટસએપ પર સ્ટેટસ ગોઠવવાનું. બેતાલીસ ડીગ્રીમાં પણ શુટબુટ આપણી પર્સનાલીટી ગણાય જ છે. અંગ્રેજીના બે ચાર શબ્દો બોલ્યા કે લખ્યા વગર અહી વટ નથી પડતો. વાઈફનો સ્પેલીંગ v થી અને my son ને may san લખનારા પણ અંગ્રેજી સીવાય વાત નથી કરતા. કઈ સારી હોટેલમાં શેરડીનો રસ મળે છે?? ગુજરાતની કઈ પંચતારક હોટેલ(હોટેલનું ગુજરાતી ન આવડયું)માં બાજરાનો રોટલો મળે છે?? યુરોપના બધા દેશ પણ અંગ્રેજી નથી બોલતા યુરોપ કરતા વધારે અંગ્રેજી ભારતમાં બોલાય છે. આપણે ભાષાના એટલા ગુલામ થયા કે જે વસ્તુનું અંગ્રેજી નામ બને કે એની પાછળ ગાંડા થઈએ. લેંઘો દોઢસો રુપિયાનો નથી લેવો પણ 'પ્લાઝો' નામ બનાવો પંદરસોમાં વેંચાય, પોપકોર્ન વેંચાય ધાણીં નામ રાખો કોઈ ન ખાય, જયુસ બધે મળે પણ શેરડીના રસનું ઈંગલીશ ન થયું તો એ સારા મોલમાં નથી મળતું, ચડો ન ગમ્યો પછી એને કેપ્રી કહેવી પડી. ગુજરાતી હોટલ, ગુજરાતી જમવાવાળા, ગુજરાતી વેઈટર, ગુજરાતી રસોયા, ગુજરાતી ભોજન અને મેનું અંગ્રેજીમાં જોયું હશે.
આપણે આપણી પાસે જેટલું સારું છે એ પણ નથી સ્વીકારતા અને પછીં આમા આત્મનિર્ભર કેમ બનવું? પશ્રિમનું ઘણું બધુ બહુ સારું છે એ આપણે નથી સ્વીકારતા. એમનો વિવેક, સામાજિક સમાનતા, તર્કસભર તપાસ, બીજાનો વિચાર કરવો, સેલ્ફ ડીસીપ્લીન, વૈજ્ઞાનિક અભિગમ આમાથી આપણે લગભગ કાંઈ નથી સ્વીકાર્યું. આપણે એમની અપવાદવાળી ભાષા, આબોહવાને પ્રતિકુળ પોષાક, અપૌષ્ટીક ખોરાક વગેરે લીધું, આપણી સંસ્કૃતિમાંથી આપણે ઢોંગ અને અંઘશ્રધ્ધા સીવાય લગભગ નથી લીધું.
હવે સમયસર વખત બદલવાનો ટાઈમ આવી ગયો છે. આપણાં દેશમાં ભારત અને ઈન્ડીયા બન્ને દેશ એક સાથે જીવે છે. જેમાં ભારતનો સમય વહેલી સવારથી શરુ થાય છે. જયારે ઈન્ડીયા રન એટ 11 am. ખેડુત અને ગામડાં મહદઅંશે સવારે જાગે છે. શહેરોમાં બપોરે સવાર થાય છે. આપણી આબોહવા મુજબ બધી ઓફીસો સવારે ખુલતી હોય તો અનુકુળ રહે. ખેડુત દુધ બકાલું વેચવા સવારે આવે અને સાતબારનો દાખલો કઢાવવા બાર વાગે આવવાનું!
નિશાચર પ્રાણીઓને બાદ કરતાં પ્રકૃતિના તમામ પ્રાણીઓ અરુણોદય પહેલાં ઉઠી જાય છે. અરે ગધેડો પણ દિ ઉગ્યા પહેલાં ઉઠે છે. માણસ માત્ર તડકો થયા બાદ ઉઠે છે. જો કે બધું ખુલે જ બપોરે તો વહેલું ઉઠી કરવું એ શુ? વહેલા ઉઠી શું ડાકોરનાં મજીરાં વગાડવા કે મુગટલાલ જોષીના પરભાતીયાં સાંભળવા?
સમય સવારનો થાય તો મન પ્રફુલ્લીત હોય જેથી કાર્યક્ષમતામાં વધારો થાય. વિજળી અને પાણીના વપરાશમાં પણ ઘટાડો થઈ શકે. બપોર પછીનો સમય કુટુંબીજનો અને બાળકો સાથે વિતાવી શકે. ગ્રામ્ય કક્ષાના ઉત્પાદનો અને એમનું બાઝાર બને એમના માટે યોજનાઓ બનવી જરુરી છે. જેથી થોડી ઘણી આપણી હસ્તકળા છે તેને જીવતી રાખી શચાય બાકી આ વૈશ્વિક અને ટેકનોલોજી યુગમાં સંપૂર્ણ આત્મનિર્ભર શકય નથી. અને હા કોઈ દેશ કે પ્રોડકટને બોયકોટ કરી કશું શકય નથી. માત્ર આપણી શકય એટલી સ્થાનિક વસ્તુઓ વાજબી ભાવે લેતા વેંચતા થઈએ..
ચિંટીયો : રઘાએ એપલના મોબાઈલથી ફેસબુક પર અંગ્રેજીમાં.. i support indian product

સાભાર :-
પોપટ ખુંટી
Popat Khunti