પત્થર વીંધતું પાણી - કડીયા ધ્રો

મિત્ર રમેશભાઈ આહીરના વૉટસઅપ સ્ટેટ્સમાં એક ન્યૂઝનું ફોટો જોયું... ટાઇટલ હતું "કુદરતને આ નકશીકામ કરતાં 1 કરોડ વર્ષ લાગ્યા"...વાંચતા જ આશ્ચર્યનો પાર નહીં...કચ્છમાં આવી તો વળી કઇ જગ્યા છે જે 1 કરોડ વર્ષ જુના સમયની સાક્ષી છે...બીજા વિડિઓ અને ફોટો પણ તેમણે મૂક્યાં અને કહ્યું કે અમારા ગામના બાજુમાં જ છે...આવો ક્યારેક મજા આવી જાય એવી જગ્યા છે...

જન્માષ્ટમીના સવારના ભાગમાં હું અને મિત્ર મોહન અંતરજાળ ગામની સીમમાં આવેલ ડેમ પાસે વહેતાં પાણીને જોવા ગયા હતા ત્યારે નક્કી કર્યું કે ચાલો આપણે 2 જણા ફરવા જઈએ રાત્રે મોડેકથી પરત આવી જશું...પણ જશું ક્યાં ?? એ પ્રશ્નના જવાબરૂપે જગ્યા નક્કી કરી...નથ્થરકુઈ જગ્યા પાસે નદીમાં આવેલ ખીણ બહુ જોરદાર છે...ત્યાં જઈએ...

બપોર 2 વાગ્યે આસપાસ નીકળ્યા એક એવી જગ્યાની શોધમાં જે સદીઓની સાક્ષી છે...ઠેઠ સુધી વરસાદ આવશે એ ધ્યાનમાં રાખીને એવી તૈયારી સાથે નીકળ્યા ભુજના રસ્તે ભીંજાતા ભીંજાતા...ભુજથી આગળ કોડકી રસ્તે ખારી નદીની ઊંડી ખીણને પણ જોઈ...હજી અમારી સફર 40 કિલોમીટર બાકી હતી એટલે રસ્તામાં ક્યાંય પણ રોકાયા વગર કોડકી,મખના, પાયરકા, ભડલીના ડુંગરાળ રસ્તે પસાર થતાં થતાં ખૂબ મોજ આવી...પહોંચ્યા કોટડા થરાવડા ગામ...હવે મૂંઝવણ એ છે કે ફોનમાં નેટવર્ક આવતું નથી અને રમેશભાઈ ક્યાંય દેખાતા નથી...કરવું તો કરવું શું ? ક્યારેક નેટવર્ક આવે ને અચાનક ચાલ્યું જાય..એમાં વચ્ચે રમેશભાઈનો કોલ આવ્યો કે ગામમાંથી એક ભાઈ તમારા સાથે આવશે એમના સાથે આવો...હું કડિયા ધ્રો જ જાઉં છું...

કોટડા ગામથી સીમના રસ્તે પેલે તો મોટી મોટી 2 નદીઓ પાર કરવાની....1 ડેમ પાર કરવાનું....અને હા....10-12 કિલોમીટરનો એકદમ પહાડી અને જંગલનો રસ્તો તો ખરો જ...એકદમ નિર્જન વિસ્તારમાં પ્રકૃતિના કેટકેટલા રંગ જોવા મળ્યા...મનોમન થાય કે
"પ્રકૃતિ તારા કેટકેટલા રંગ,
જોઈ તને થઈ જવાય છે અંતરંગ".
શાંત જગ્યાએ કુદરતી શોરની મજા એટલી બધી કે એની વાતો ન થાય એ તો મહેસુસ કરીએ તો અનુભવાય...

ઝાડી ઝાંખરાઓના રસ્તે અમે પહોંચ્યા...કડીયા ધ્રો...
કમાલની કુદરત...લાંબી અને મોટી ખીણો... પાણીના ધોધ... સુમસામ જંગલમાં આવેલ કુદરતનો શોર...
પહાડોની પ્રકૃતિ...એવું તો કેટલુંય...જાણે મોજે મોજ...

અનંતના આશરે આ જગ્યા એવી તો વિશાળ કે નદીપટમાં અંદર ઉતરતા જ દ્રશ્યો જ દ્રશ્યો હતાં...આદિલ મન્સૂરી કહે તેમ "નદીની રેતમાં રમતું નગર મળે ન મળે, ફરી આ દ્રશ્ય સ્મૃતિપટ પર મળે ન મળે" એવા જ રમણીય દ્રશ્યો...
કચ્છમાં અનેક વિશેષતાઓથી છલોછલ છે...એની સાબિતી આ જગ્યા આપે...

કુદરતી નકશીકામ વાળી આ જગ્યાએ વહેતા પાણીનો શોર એટલો બધો કે ત્યાં માણસનું કાંઈ જોર ન ચાલે...
બસ એક જ અનંતનો આશરો...આ પત્થરો અનેક સદીઓના સાક્ષી છે...સમયના અનેક પ્રવાહ તેણે જોયા છે... ઘણું બધું પામેલ આ પત્થર એકદમ મૌન છે...આરપાર વીંધાઈને પણ આશ્ચર્ય ઉભું કર્યું છે...
જોતાવેંત નિઃશબ્દ થઇ જઈએ અને બસ જોતા જ રહીએ એવી અદભુત અને અફલાતુન આ જગ્યાનો પ્રવાસ જીવનભર યાદ રહેશે...

કચ્છડો બારે માસ માણવું હોય તો આ જગ્યા the best... જોયું તે જાણ્યું અને મળ્યું તે માણ્યું...
વળતી વખતે રસ્તામાં અંધારું ઘોર એટલું બઘું કે સામે રસ્તે તો બાઇકની લાઇટ હોય એટલે થોડું દેખાય...પણ પાછળ વળીને જોઈએ તો અંધારું ઘોર...ચંદ્રની ચાંદનીના આછા અજવાળે ડુંગરોની ટોચ સિવાય કાંઈ ન દેખાય એવું અંધારું ઘોર...

ઉમાશંકર કહે તેમ "સૌન્દર્યો પી, ઉરઝરણ ગાશે પછી આપમેળે"...આવી જગ્યા જોઈને ઉરઝરણ વહેતું થયા વગર ન રહે અને સમયના આ પ્રવાહમાં આપણે પણ વહેતાં થઇ જઈએ...

અનંતની આ મોજ માટે એક જ શબ્દ "કમાલની કુદરત".

-વિજય આહીર
જન્માષ્ટમી,2020.
કડીયા ધ્રો,
કોટડા થરાવડા, કચ્છ.

https://m.facebook.com/story.php?story_fbid=2826197434279688&id=100006683773535