પુસ્તક = માર્ગદર્શક, શિક્ષક, મિત્ર, પ્રેરણાસ્ત્રોત

“વિશ્વ પુસ્તક દિવસ”
બાળપણ થી જ પુસ્તકો સાથે નો મારો સંબંધ અતિશય ગાઢ રહ્યો છે. મારા વ્યકિતત્વ, સુઝ-સમજ, જ્ઞાનના વિકાસ મા પુસ્તક વાંચન નો અમુલ્ય સિંહફાળો છે. દરરોજ પુસ્તકો નું વાંચન એ નહાવા જેટલું જ મહત્વનું છે. મને પુસ્તકો વાંચવાનું ગમે છે અને હું પુસ્તકો વિના આ દુનિયાની કલ્પના કરી શકતો નથી. મારા મેયરકાળ મા લોકો ને “બુકે નહી બુક” આપવાનો મારો આગ્રહ રહેતો અને વડોદરાના ઈતિહાસ મા પ્રથમ વાર “નેશનલ બુક ફેયર” નુ આયોજન મે કરેલ જેનો લાભ લાખો લોકો એ લીધો હતો. મેં આજ સુધી સેંકડો પુસ્તકો વાંચ્યા છે. પુસ્તકો હંમેશાં મારી સાથે હોય છે. દરેક વ્યક્તિને લગ્ન-ભેટ માં પણ હું હંમેશા પુસ્તક જ આપું છું.

સૂતા પહેલા દરરોજ 1-2 કલાક પુસ્તક, ઇબુક્સ, બ્લોગ્સ અથવા ઓન લાઈન લેખો વાંચવા જોઈએ અને તેને તમારી રોજિંદા ટેવ બનાવવી જોઈએ. જો તમે માતાપિતા છો તો પછી જ્યારે તમે બાળકોની સામે પુસ્તકો વાંચશો તો તે પણ તમારી પાસેથી શીખશે અને બાળકો માટે પુસ્તકો વાંચવું ખરેખર મહત્વપૂર્ણ છે. બાળકોને તેમની સામે વાંચ્યા વિના, પુસ્તકો વાંચવાનું શીખવવું મુશ્કેલ છે.

લોકડાઉન જેવી વિપરીત પરિસ્થિતિ મા પણ પુસ્તકો મારા સાચા મિત્રો બની ને સાથ આપી રહ્યા છે..

પુસ્તક પર થોડીક પંક્તિઓ રજુ કરુ છુ .

“જીવન ભવ્ય છે પણ પુસ્તક દિવ્ય છે,
પુસ્તક તમારા સમયને રસપ્રદ બનાવે, અંતરમનમાં પ્રેરણા જગાવે;
પુસ્તક છે હરઘડીનો સાથી, પુસ્તક જેવો કોઈ મિત્ર નથી;
પુસ્તકનો મહિમા અનેરો છે, પુસ્તકમાં જ્ઞાનની શબ્દરૂપી વહેતી વિચાર લહેરો છે;
પુસ્તક છે પરમાર્થ સમાન, પુસ્તકનું કરીએ વાંચન કરીને સન્માન;
જેને છે જ્ઞાનરસ પામવાની ખેવના, એ ક્યાંથી કરી શકે પુસ્તકની અવહેલના;
પુસ્તક જ્ઞાનનો સાગર છે વાંચન થકી ડૂબકી લગાવો;
એમાંથી વિવેક, આનંદ અને કેળવણીના મોતી લઈ આવો;
પુસ્તક એકાંત અને એકલતાનું ઔષધ છે
જીવનમાં ભલે તક જાય, પણ ધ્યાન રહે કે હાથમાંથી પુસ્તક ન જાય“

👍  ડો. ભરત ડાંગર (વડોદરા)