આભા કાર્ડ - ભારતના દરેક નાગરિકનું હેલ્થ કાર્ડ

ભારતમાં અલગ-અલગ યોજનાઓને લઈને અલગ- અલગ કાર્ડ બનાવવામાં આવે છે. જેવા કે સ્વાસ્થ્ય યોજના માટે આયુષ્માન ભારત કાર્ડની યોજના છે. હાલ ભારતમાં આભા કાર્ડને લઈને ખૂબ ચર્ચાઓ થઈ રહી છે. શું છે આ આભા કાર્ડ ?

આભા કાર્ડનું આખું નામ છે, આયુષ્માન ભારત હેલ્થ એકાઉન્ટ. આ કાર્ડ આયુષ્માન ભારત ડિજિટલ મિશન તરીકે લોન્ચ કરવામાં આવ્યું છે. એટલે કે આ એક રીતે હેલ્થ કાર્ડ છે. 

આભા કાર્ડમાં 14 ડિઝિટનો નંબર હોય છે. આ એક રીતે એક ઓળખપત્ર તરીકેનું કામ કરે છે, એટલે કે આ કાર્ડથી નંબરથી તમે આયુષ્યમાન ભારત યોજના હેઠળ સુવિધાઓ લઈ શકશે.

આ કાર્ડ દ્વારા તમે તમારા આરોગ્ય અંગેની પુરી જાણકારી એક જ જગ્યાએથી મેળવી શકશો અને તમારો મેડિકલ રેકોર્ડ પણ એક જગ્યા પર જ વ્યવસ્થિત રીતે સાચવી શકશો.  સાથે સાથે તેના દ્વારા હોસ્પિટલો અને ડોક્ટરો વિશે માહિતી મેળવી શકશો. 

કેવી રીતે બને છે આભા કાર્ડ ?

આભા કાર્ડ બનાવવા માટે સૌથી પહેલા તમારે આભાની અધિકૃત વેબસાઇટ https://ndhm.gov.in/ પર જવું પડશે. તે પછી તમારે આભા કાર્ડ બનાવવા માટે ક્લિક કરવાનું રહેશે. આ પછી તમારી પાસે તમારા ડ્રાઇવિંગ લાઇસન્સ અને આધાર કાર્ડ નંબરથી આધાર કાર્ડ મેળવવાનું ઓપ્શન હશે.

આ આભા કાર્ડ તમે કોઈ પણ જાતની તકલીફ વિના તમારો આધારકાર્ડ અને અન્ય વિગતો ઓનલાઇન અપલોડ કરીને પોતે પણ ઇશ્યુ કરાવી શકો છો.

આયુષ્યમાન ભારત હેલ્થ સ્કીમ હેઠળ ઓનલાઇન આભા કાર્ડ બનાવી આપવામાં આવી રહ્યા છે. તેમ શક્ય ન બને તો તમે કોઈપણ અર્બન હેલ્થ સેન્ટરમાં જઈને આભા કાર્ડ કઢાવવા માટેની ઓનલાઇન અરજી કરાવડાવીને ગણતરીની મિનિટોમાં કાર્ડ મેળવી શકો છો.

હા, તમારો મોબાઇલ ફોન નંબર આધારકાર્ડ સાથે લિંક થયેલો હોવો જરૂરી છે. તેમાં ઘરનું સરનામું અને તેના સ્વજનોના નંબર પણ મળી જશે. વીમા કંપનીઓ પણ સમય જતાં તેની સાથે લિંંક કરી દેશે. પરિણામે સમય જતાં તેના થકી વીમા ક્લેઇમ પણ સેટલ થઈ શકશે.

આભા કાર્ડ કઢાવી લેનારને ભારતના કોઈપણ ખૂણે અકસ્માત થાય તો તેવા સંજોગોમાં તેના આભા કાર્ડની મદદથી તમામ કેસ હિસ્ટ્રી મેળવી લઈને ભારતભરની હૉસ્પિટલ્સમાં સારવાર ઝડપથી ચાલુ કરી શકાશે.

અર્બન હેલ્થ સેન્ટરના અધિકારીઓનું કહેવું છે કે આભા કાર્ડ કઢાવનારને આખા ભારતમાં રૂ. 5 લાખ સુધીના ખર્ચની સારવાર મફતમાં મળી શકે છે. ગુજરાતમાં કેન્દ્ર સરકારની પાંચ લાખ અને રાજ્ય સરકારની પાંચ લાખ મળીને કુલ રૂ. 10 લાખ સુધીની સારવાર મફતમાં મળે છે.

આભા કાર્ડ ધરાવનારાને કોઈપણ હૉસ્પિટલમાં સારવાર લેવા જતાં પહેલા તેના જૂના રિપોટ્‌ર્સની ફાઇલ પણ લઈ જવી પડશે નહિ. આભા કાર્ડ કઢાવ્યા પછી કોઈ પણ ડૉક્ટર પાસે સારવાર લેતી વખતે તેનો નંબર આપીને સારવાર લેશો તો આભા કાર્ડ પર જ તમારા આરોગ્યનો સંપૂર્ણ રૅકોર્ડ બનશે અને સચવાઈ પણ રહેશે.

આભા કાર્ડમાં વ્યક્તિના બ્લડ ગ્રુપ, તમારી બીમારીઓ તથા અન્ય શારીરિક સમસ્યાઓ તેમ જ સારવાર દરમિયાન ડૉક્ટરે તમને આપેલી દવાઓ અને ડૉક્ટર સંબંધિત તમામ માહિતીઓ એકત્રિત થઈ શકશે.

અમદાવાદના જ અર્બન હેલ્થ સેન્ટરના ઉચ્ચ અધિકારીનું કહેવું છે કે, ‘શારીરિક તકલીફ થાય ત્યારે જૂના રૅકોર્ડ કે ડૉક્ટર પાસે લીધેલી સારવારની ફાઇલ શોધવામાં તકલીફ પડે છે. પરંતુ જેમની પાસે આભા કાર્ડ હશે તેમને આ તકલીફ નડશે નહિ. માત્ર કાર્ડ લઈ જશો તો ડૉક્ટરને તમારી આખી હિસ્ટ્રી મળી જશે. 

કાર્ડ પણ ભૂલી જશો અને આભા કાર્ડનો નંબર યાદ રાખી લેશો તો પણ તમારી સંપૂર્ણ કેસ હિસ્ટ્રી ડૉક્ટરને મળી જશે. આમ તમે માત્ર હૉસ્પિટલમાં કે ડૉક્ટર પાસે જઈને તમારા આભા કાર્ડનો ડિજીટલ આઇડી આપશો તો તમારું કામ થઈ જશે.’ 

આભા કાર્ડમાં લેબ ટેસ્ટના દરેક રિપોર્ટ પણ સ્ટોર થઈ શકશે. પરિણામે અજાણ્યા ડૉક્ટર્સ પણ તમને વ્યવસ્થિત સારવાર આપી શકશે. આભા કાર્ડ ઇશ્યુ કરાવ્યા બાદ જીવન દરમિયાન જેટલી પણ સારવાર લીધી હશે અને તમારા જે કોઈ મેડિકલ રૅકોર્ડ બન્યા હશે તે તમામ રૅકોર્ડ તેના પર આવી જશે. ગુજરાતના અંતરિયાળ વિસ્તારમાં આવેલા ગામડાંમાં વસતા નાગરિક પાસે પણ આભા કાર્ડ હશે તો તે ટેલિમેડિસિનના માઘ્યમથી અમદાવાદના ડૉક્ટરનું માર્ગદર્શન મેળવી શકશે. 

ખાનગી ડૉક્ટરની સેવાઓ પણ સરળતાથી મળી શકશે. આભા કાર્ડ સાથે વીમા કંપનીઓને પણ લિંક કરી દેવામાં આવી છે. પરિણામે આભા કાર્ડ ધારકને વીમા કંપનીઓની સેવા પણ સરળતાથી મળી શકશે. દરેક દરદી હૉસ્પિટલ્સ, વીમા કંપની અને ક્લિનિક સાથે તેનો આરોગ્યનો રૅકોર્ડ આસાનીથી આપી પણ શકશે.

સાભાર :-

ગુજરાત સમાચાર દૈનિક

તેમજ વિવિધ સોશ્યલ મીડિયા સોર્સ...